Zyrus pasok sa BFGF

CEBU, Philippines - Malakip ang Sugbuanon nga young actor nga si Zyrus Desamparado sa umaabot nga serye sa TV 5 alang sa kabatan-onan nga nag-ulohan og BFGF (Boyfriend-Girlfriend).

Gawas kang Zyrus, lakip usab sa maong programa sila si Alex Gonzaga , Tuesday Vargas, Monching Gutierrez, Chris Cayzer, Nico Umali, Angelo Patrimonio ug ang lead vocalist sa Callalily nga si Kean Cipriano.

“Nalipay gyud ko og maayo kay gitagaan gyud ko og maayong project sa TV 5 , nice pud kaayo kay buotan ug ilado napud nga mga artista ang akong mga kauban sa show,” tsika pa ni Zyrus sa dihang nahinabi sa Banat Hugyaw kagahapon.

Usa ka komedyante ang gidala nga role ni Zyrus sa maong show busa mipaubos siya og todo nga workshop.

“ Hinaut nga suportahan ko sa mga taga Cebu, segurado ko nga makilig sila sa istorya sa BFGF. Ang format man gud ani kay murag may pagka- T.G.I.S. ug Gimik . Basta lingaw gyud siya ug sure ko nga daghang maka-relate nga mga teenagers,” dugang pa ni Zyrus.

Naghinam-hinam na si Zyrus niini gumikan kay magsugod na ang maong show karong Abril 4 sa alas kuwatro sa hapon. 

“Daghang sila nga makuha nga lessons sa show, usa na niini ang maayong pag-handle sa usa ka relasyon . Dapat kung musulod ta sa maong butang, kinahanglan nga andam ta sa bisan unsa nga mahitabo ug kabalo ta sa atong responsibilities,” ni Zyrus pa.

Sa laing bahin, mapahiyomong gipaambit ni Zyrus dinhi sa Banat Hugyaw nga mapahiyomon siya karong panahona gumikan kay nominado siya alang sa New Movie Actor of the Year category alang sa pelikula niya nga Engwentro sa umaabot nga 2010 PMPC Star Awards for Movies .

Iyang katigi sa nahisgutang kategorya sila si Enchong Dee ("Paano Ko Sasabihin"), Romalito Mallari ("Dinig Sana Kita"), Joey Paras ("Last Supper No. 3") ug Chase Vega ("Agaton And Mindy").

Gawas niini, nominado usab siya sa laing award-giving body , ang 7th Golden Screen Awards alang sa Breakthrough Performance by an Actor category ug gumikan gihapon kini sa gipakita niya nga abilidad sa Engkwentro.

“Grabe gyud ang nadawat nako nga blessings busa nagpasalamat ko kang God niini   ug nanghinaut ko nga magsunod-sunod na nga TV projects ang akong madawat.Nagpasalamat pud ko og maayo sa akong pamilya ug sa akong mga friends kay supportive kaayo sila sa akong career,” panapos pa ni Zyrus. - Sanden J. Anadia