May gap ba sina Bing at Jaya?

Marami ang nakapansin na malamig sa isa’t isa sina Bing Loyzaga at Jaya.

Nagkita ang dalawa nang mag-guest kamakailan sa SOP, na kung saan ay isa sa mga host si Jaya, si Bing at ang dalawa niyang anak.

Halos ay di magpansinan ang dalawa at kung mapilitan man ay very cold sila sa isa’t isa.

Nakapagtataka ito, lalo na sa mga malalapit sa dalawa, dahilan sa dati-rati ay best of friends sila.

Wag lang na di magkita ay hindi na sila mapuknat sa tsikahan. Ngayon daw ay parang may wall na nakapagitan sa kanila.

Gaano katotoo na si Bing ang dahilan ng kanilang pagkakaroon ng distansya?

* * *

Maaari nang tawaging "Crossover Queen" si Lani Misalucha. Magkakaroon na naman siya ng second edition ng Crossover Live Tour sa unang quarter ng taong 2003. Matatandaan na ang first major concert niya, ang Lani Misalucha:The Crossover Live Tour ay pinrodyus ng 105.-1Crossover.

Bukod kay Lani, sinupor-tahan na rin ng Cros-sover sina Martin Nie-vera, Regine Velasquez, Basil Valdez, Jaya, Side A Band lead vocalist Joey Generoso at Gary Valenciano.

Ang Crossover Live Tour ay magsisimula sa Enero 11 (Bacolod) at masusundan sa Enero 18 (Cebu), Enero 25 (Davao), Pebrero 1 (Pampanga) at Pebrero 8 (Manila).

Makakasama ni Lani sa Bacolod at Davao ang lead vocalist ng Side A na si Joey Generoso. Si Ogie Alcasid naman ang kasama sa Cebu at Pampanga.

Ang Lani Misalucha:The 2nd Crossover Live Tour ay nasa direksyon ni Rowell Santiago. Si Louie Ocampo ang musical director.

Iibahin ang repertoire ni Lani dito sa ikalawang edition ng Crossover. Pero sa bagong awitin ay ipakikita pa rin niya ang kanyang mastery sa pagkanta.

Dahil seryoso ang tema ng palabas, wala siyang gagawing impersonation. Sa halip, magbibigay siya ng tribute kina Barbra Streisand, Celine Dion, Bette Middler at ang mga jukebox queens na sina Imelda Papin, Claire dela Fuente, Eva Eugenio, Didith Reyes at ang Aegis.

"Hindi na rin ako hihiga, kumita na yun. Iisip naman ako ng ibang gimmick," ani Lani na nagpapasalamat ng malaki sapagkat naging maganda para sa kanya ang taong 2002.

Sa Biyernes, Dis. 13, mapapanood si Lani sa Bantay Bata concert, ang One For The Child na magaganap sa Fr. Blanco’s Garden. Makakasama niya ang San Miguel Chorale at San Miguel Philharmonic Orches-tra.

Kasama rin siya sa Back To Back, ang Christmas Special ng GMA7 na kinunan sa Our Lady of the Abandoned sa Sta Ana na napanood kagabi.

* * *

Napili na ang pitong pelikula na makakasama sa Magic 7 para sa Metro Manila Film Festival Philippines na magsisimula sa Pasko. Ito ang Ang Agimat ng Imus Productions, starring the three generations of the Revillas, Senador Ramon. Ramon Bong Jr. at Jolo; Ang Alamat ng Lawin ng FPJ Productions topbilled by Fernando Poe, Jr and Ina Raymundo; Dekada ’70 sa pangunguna nina Vilma Santos at Christopher de Leon; Home Alone D Riber ng RVQ Productions starring Dolphy and Jolina Magdangal; Hula Mo, Huli Ko, Reflection Films, starring Rudy Fernandez and Rufa Mae Quinto; Lapu Lapu nina Lito Lapid at Joyce Jimenez para sa Calinauan Cinemaworks, Classic Films at Seed of Zion Films, Inc. at Mano Po ng Regal Entertainment, isa ring all-star cast na pinangungunahan nina Eddie Garcia, Ara Mina, Kris Aquino, Gina Alajar, Amy Austria, Eric Quizon at marami pa.

Ang dalawang natirang pelikula –Spirit Warriors (MAQ) at Lastikman (Octo-Arts at M-Zet Films) ay makakasama rin sa MMFFP na tatagal sa orihinal na pitong araw hanggang sa 15-17 na araw. Pagkatapos ng panahong ito, saka pa lamang magpapalabas ng mga pelikulang dayuhan.

Qualified din ang dalawang pelikula para sa P50 M subsidy na ipinagkaloob ni Pangulong Gloria Arroyo sa unang pitong pelikula at sa lahat ng awards. Makakasama rin ang mga ito sa parada.

Sinabi pa ni Mayor Rey Malonzo, chairman ng screening committee, na kung hindi lamang maapektuhan ang magiging kita ng unang pitong pelikula ay baka pagsasabay-sabayin nang ipalabas ang siyam na pelikula.

Dahilan sa mga naitala ng regulasyon para sa MMFFP, ang dalawang huling pelikula ay magsisimulang mapanood sa ikalawang linggo ng Pista ng Pelikula.

Email: [email protected].