‘Nail Cutter’ (Part 10)
KINABUKASAN, isinama ni Melchor sa aming tinitirahang villa ang kakilalang alahero na si Noel. Kay Noel namin ipasusuri ang nail cutter na aking nabili sa second hand market.
Bumili ako ng pagkain para kay Noel—kabsa, fried chicken at softdrinks. Bumili rin ako ng leche flan at iba pang panghimagas. Maraming Pinoy na restaurant sa Batha.
Nang ipakita ko kay Noel ang nail cutter ay namangha siya.
“Mukhang kakaiba ito ah!” sabi niya.
“Pure gold ba Noel?” tanong ni Melchor.
“Sa tingin ko, Melchor. Iti-test ko.”
Idinaan ni Noel sa test ang nail cutter. Mayroon siyang equipment para matiyak ang kalidad ng ginto.
Habang isinasagawa ang pag-test ay tinanong ako ni Noel.
“Saan mo nabili itong nail cutter Bro?”
“Sa Manfouha.”
“A sa second hand market.”
“Oo, Noel. Nakapunta ka na roon?”
“Hindi pa pero nabalitaan ko na maraming magagandang gamit dun kahit second hand. At mura raw.”
“Oo, Noel. Napakaraming second hand na gamit na sa tingin ko, wala pang isang taon na ginamit.”
“Bakit nail cutter ang binili mo Bro? Yun lang ang sinadya mo roon?”
“Oo, Noel. Kolektor kasi ako ng nail cutter—mula pa nun, nagkokolekta na ako.”
“Ah kaya pala.”
“Nang makita ko ang tambak ng nail cutter sa isang stall sa Manfouha, agad kong hinalukay. Mga mahigit 100 piraso ang nakuha ko. Binayaran ko—mura lang.”
“Dun kasama itong nail cutter na sinusuri natin?”
“Oo.”
Maya-maya tsinek ni Noel ang sinusuring nail cutter. Namangha ito.
“Pure gold ito ah! Twenty one carat!”
Hindi ako makapaniwala. Maski si Melcor, mangha rin. (Itutuloy)
- Latest
