‘Nail Cutter’ (PART 9)
‘‘IPASUSURI natin sa kakilala kong alahero ang nail cutter na ito,’’ sabi ni Melchor.
“Kung antique ito, magkano kaya Melchor?” tanong ko.
“Hindi ko masasabi Bro. Basta ipasusuri natin.”
“Narito ba sa Saudi ang kakilala mo o nasa Pinas?”
“Narito siya. Dati siyang nagtatrabaho sa tindahan ng ginto sa Bulacan—sa Guiguinto.”
“Ah oo naririnig ko na ang lugar na yun. E anong trabaho niya rito, Melchor?”
“Nagdedesenyo siya ng mga singsing at iba pang alahas. Mahusay ang kamay niya sa design.”
“E di malaki ang suweldo niya?”
“Oo. Baka triple ng sahod niya sa Pinas.”
“Galing naman niya!”
“Yayayain ko siya rito at ipati-test natin ang nail cutter mo. Malapit lang ang housing accommodation nila rito—diyan lang sa may Airport Road.”
“Sige Melchor. Bibili ako ng ipakakain natin sa kanya. Puwede na siguro ang kabsa at fried chicken ano?”
“Oo puwede na yun. Hindi naman yun, pihikan sa pagkain. Mabait yun.”
“Sige Melchor.”
“Bukas isasama ko siya rito. Para malaman natin kung antique ang nail cutter mo. Pero kutob ko, purong ginto ‘yan.”
“Sana nga, Melchor.”
“Baka maging milyonaryo ka, Bro.” (Itutuloy)
- Latest
