Lamang-ugat na hugis tao, nahukay sa China!

HINDI makapaniwala ang magsasakang si Zheng Dexun nang makita ang nahukay sa kanyang taniman ng gulay. Ang nahukay niyang fleeceflower o Chinese knotweed ay korteng tao! Nag ulat siya sapagkat akala niya, munting bata ang kanyang nahukay.

Si Zheng ng Langzhong, China ay matagal nang magsasaka. Pero ayon sa kanya, ngayon lamang siya nakahukay ng ganitong lamang-ugat na korteng tao.

Ang lamang-ugat ay may taas na 62 centimeters. Maayos na maayos ang pagkakaporma ng mga kamay, binti at ulo. Malalaki at nakausli ang mga mata nito.

Sabi ni Zheng, hindi niya alam kung mabuti o masama ang pagkakahukay niya sa lamang-ugat na korteng tao pero desidido umano siyang ibalik muli sa lupa ang nahukay. Nakokonsensiya raw siya sapagkat parang tao ang kanyang nahukay.