Pampasaherong bus nasunog sa terminal

CAMP VICENTE LIM, Laguna, Philippines — Isang nakaparadang pampasaherong bus ang natupok makaraang sumiklab ang sunog sa Roxas Grand Terminal sa Barangay Bagumbayan, Roxas, ­Oriental Mindoro, kahapon ng umaga.

Ayon sa ulat, naganap ang sunog dakong alas-8 ng umaga nang bigla na lamang nagliyab ang Gold Star bus na pinamamahalaan ng Ceres Transport, sa loob ng terminal nito.

Wala namang iniulat na nasugatan o nasaktan sa insidente dahil nakababa na ang lahat ng pasahero ng bus nang maganap ang insidente.

Agad namang rumes­ponde sa lugar ang dalawang fire truck mula sa Roxas-Bureau of Fire Protection (BFP) upang maapula ang apoy.

Nagdeklara ang BFP ng fire out bandang alas-8:30 ng umaga.

Sinisilip na electrical fault sa air-conditioning wiring ng bus ang pinagmulan ng apoy, ayon kay Senior Fire Officer 3 Querube Peradilla, officer-in-charge ng ­Roxas BFP.

Nabatid na kararating lang mula sa Maynila ang nasabing bus, nang mangyari ang sunog.