Bibili lang ng feeds, lalaki sinalvage

BACACAY, Albay, Philippines — Bangkay na nang matagpuan ang isang lalaki na bibili lang ng feeds at ilang araw na hindi nakauwi matapos patayin at itapon ang katawan nito sa malayong lugar ng Purok-6, Brgy. Misibis sa Cagraray Island ng bayang ito kamakalawa ng hapon.

Pinaniniwalaang namatay makaraang puluputan ng packaging tape ang buong ulo kasama na ang bibig at ilong ng biktima na kinilalang si Jan Mark Balguma Rapisura, 36, ng Purok-1, Brgy. Travesia, Guinobatan.

Sa ulat, dakong ala-1:15 ng hapon, nagulat ang mga residente nang makita ang bangkay ng lalaki na nababalutan packaging tape sa ulo na itinapon sa lugar.

Pinaniniwalaang tatlong araw nang patay ang biktima dahil halos namaga na ang buong katawan nito.

Huling nakita ang biktima noong Pebrero 27 ng hapon nang magpunta siya sa bayan para bumili ng feeds na pagkain ng mga alagang baboy. May nakapansin na sumakay ang biktima sa isang kulay itim na Toyota Vios na kotse at mula noon ay hindi na nakabalik sa kanyang tahanan.