Paslit dinukot, 3 kidnaper tiklo

CAMP AGUINALDO – Dinukot ng limang armadong kalalakihan ang isang 4-anyos na batang lalaki na anak ng isang negosyante habang nasakote naman ang tatlo sa mga kidnaper sa Iligan City, Lanao del Norte kamakalawa.

Sa ulat, dakong ala-1:30 ng hapon nang dukutin ang biktimang si Bashet Mangotara, ng Standford St., Celdran Village, Brgy. Tubod ng lungsod.

Nabatid na pinasok ng mga armadong kidnaper ang bahay ng pamilya Mangotara at tinangay ang biktima saka isinakay sa isang multicab.

Namataang tumahak ang mga suspek sa bahagi ng Brgy. Camague at pagsapit sa Sta. Elena ay inilipat ang biktima sa isang KIA taxi bilang getaway vehicle.

Agad namang tinugis ng mga pulisya ang mga kidnaper at nasakote ang tatlo sa mga ito.

Kinilala ang mga nasakoteng suspek na sina Marlon Dominguez, 29; Ariel Bundaon, 46 at Edgar Lao, 28.

Gayunman, nagawang makatakas ng mga kidnaper tangay ang batang biktima. (Ulat ni Joy Cantos)