Trak vs trak: 2 sibilyan patay

NUEVA ECIJA - Dalawang sibilyan ang iniulat na nasawi, samantalang apat naman ang malubhang nasugatan makaraang sumalpok ang trak sa nakaparadang cargo trak sa kahabaan ng Maharlika Highway na sakop ng Barangay Baluarte, Gapan City kahapon ng madaling-araw.

Kabilang sa namatay ay sina Arman Lopez ng Brgy. Tabon, San Isidro, Nueva Ecija at Jamie De Leon ng Brgy. Mabini, Santiago City, Isabela. Ginagamot naman sa ospital sina Daniel Carennio, Joselito Carennio, Rolando Amberus at Pastor Hadil Adjarami, isang missionary ng Univille, Bangad, Cabanatuan City. May teorya ang pulisya na walang mga tail light ang nakaparadang cargo trak (PRL-514) kaya hindi napansin at nabangga ng Fuso Truck (CWD-643) na nagresulta sa trahedya. (Ulat nina Christian Ryan Sta. Anan)