Chinese, 3 pa tiklo sa ‘SIM cards scamming’
MANILA, Philippines — Arestado ang isang Chinese national at tatlong Pilipino na huli sa akto na nagbebenta ng mga SIM cards na gamit sa online scamming sa ikinasang buy-bust operation ng mga tauhan ng National Capital Regional Police Office (NCRPO) sa Maynila kamakailan.
Sa ulat, ikinasa ang operasyon nitong Nobyembre 15 sa may Nicanor Padilla Street, San Miguel, Manila ng mga operatiba ng Regional Special Operations Group (RSOG) sa koordinasyon ng National Telecommunications Commission (NTC).
Bunsod ito ng impormasyon na ipinarating sa kanila ukol sa iligal na aktibidad sa distribusyon at pagbebenta ng mobile phone devices nang walang kaukulang permits mula sa NTC.
Nagbebenta rin ang mga suspek ng “pre-registered SIM cards” na napupunta sa mga sindikato o kumpanya na sangkot sa online scamming at iligal na Philippine Offshore Gaming Operators (POGO).
Unang nagkasa ng test buy nitong Nobyembre 7 na nagpositibo sa mga iligal na ibinibenta ng 88 XINY Tech store na hindi rin rehistradong mobile phone dealer.
Dito na nagkasa ang pulisya ng buy-bust operation na nagresulta sa pagkakadakip kina Li Peng alyas “Devin Li,” Chinese national; at mga Pilipinong sina Anelyn Cabiling; Rachelle Bufete; at Antonnette Hernandez.
Nakumpiska sa apat ang 325 piraso ng mga brand new at 2nd hand na cellphones; at dalawang piraso ng P1,000 bill na ginawang marked money kasama ang boodle money.
- Latest
