Pulis utas sa New People’s Army ambush

MANILA, Philippines — Namatay noon din si SPO3 Juje Razo, 52 ng Pilar Municipal Police Station nang ito ay harangin at pagbabarilin ng tatlong lalaki na pinaniniwalaan mga miyembro ng liquidation squad ng mga rebeldeng New People’s Army (NPA) kahapon ng umaga sa Brgy. Marifosque, Pilar, Sorsogon.

Sa ulat, dakong alas-7:30 ng umaga kahahatid pa lang ng kanyang anak sa eskwelahan at lulan ng kanyang motorsiklo patungo na rin sana sa Pilar Police Station upang mag-duty ang naka-unipormeng biktima nang parahin ng tatlong mga armado na nag aabang sa daan.

Agad itong pinagbabaril sa kung saan nahulog ito sa kanyang motorsiklo at patiha­yang bumulagta sa tabi ng kalsada. Makaraang masiguro na patay na ang biktima ay agad tumakas ang mga rebelde sa bulubunduking lugar ng barangay.