1,000 bahay nasunog sa kwitis
MANILA, Philippines – Umaabot sa 1,000 kabahayan ang nilamon ng apoy habang isa ang nasawi sa naganap na sunog matapos na tamaan ng kwitis na sinindihan matapos ang pagsalubong sa Bagong Taon sa Tondo, Maynila.
Ang nasawi ay kinilalang si Danilo Francisco 45 ng Int. 57, Raxabago St. Tundo.
Nabatid na 3,000 pamilya ang nawalan ng tirahan matapos umakyat ang sunog sa general alarm na pawang residente ng Barangay 155 at Barangay 160, sa District 2, Tondo, na nasa erya ng Dagupan Extension, Raxabago at Maria Gizon Sts.
Ayon kay Supt. Jaime Ramirez, Fire Marshal ng Manila Fire Bureau, alas-3:00 pasado ng madaling araw nang magsimula ang sunog na naideklarang fire-out alas 9:59 ng umaga.
Ayon sa imbestigasyon na kwitis, isang uri ng firecrackers ang posibleng sanhi ng malaking sunog matapos na may nakakita sa pagbagsak nito sa isang bahay na pag-aari ng isang Louie Basa, na agad ding sumiklab pati ang katabi pang luma at abandonadong bahay na yari lamang sa kahoy na pag-aari umano ng isang Lulay Soriano.
Malakas din umano ang hangin kaya’t mabilis ang pagkalat ng apoy at sinubukan ng ilang barangay tanod na apulahin ang apoy, subalit bigo silang maagapan ito hanggang sa mismong ang barangay hall ng Brgy. 155 ay matupok.
Samantala, nasa 69 kabahayan na pag-aari ng mga biktima ng bagyong Yolanda ang natupok dahil din sa paputok habang sinasalubong ang Bagong Taon sa Tacloban City, Leyte kahapon ng madaling araw.
Sa ulat ng Tacloban City Fire Marshal, bandang alas-12:19 ng madaling araw nang magsimula ang sunog sa isang bahay na pag-aari ni Salvacion Murillo, 60 na matatagpuan sa Brgy. 56, Perichon District matapos na madikitan nang sumabog na paputok.
Nagawa namang makalabas ng bahay ang matanda at ng anak nitong babaeng si Vivian matapos na lumaki ang apoy na mabilis na kumalat at tumupok rin sa mga katabi nitong kabahayan.
- Latest
