Meralco hindi magre-refund sa mga kustomer
MANILA, Philippines - Ibinasura ng Court of Appeals ang class suit na inihain ng ilang grupo ng consumers ng Meralco at iba pang respondents kaugnay ng refund sa kanilang mga binayarang nakunsumong kuryente matapos katigan ng Court of Appeals (CA) ang naging desisyon ng Makati Regional Trial Court (RTC) na nagbasura sa class suit.
Sa 18-pahinang kautusan na isinulat ni Associate Justice Agnes Reyes-Carpio na ipinalabas noong Nobyembre 15, 2012, ibinasura ng CA’s Eight Division ang inihaing apela ng Equal Justice for All Movement na pinangunahan ni Leonardo de Vera na sa hiling na ipawalangsaysay ng korte ang naunang desisyon ng Makati RTC kaugnay sa P13-bilyong refund na iligal umanong kinolekta ng Meralco sa consumers.
Maliban sa Meralco, sangkot din sa kaso ang Energy Regulatory Commission (ERC), National Power Corporation (Napocor) at iba pang respondents.
Una nang naghain ng “plea for a temporary restraining order (TRO) and a writ of preliminary injunction”ang nabanggit na mga grupo upang hindi na magawa pang ipasa ng Meralco ang nasabing charges sa mga consumer.
Kabilang pa sa hiling ng grupo na atasan ng korte ang Meralco na pabuksan ang libro para sa auditing at accounting na ibinasura din ng mababang korte kaya umakyat na sa CA.
Paliwanag ng CA, kahit may merito ang claim ng grupo na may karapatan sila sa class suit bilang kinatawan ng consumers, hindi naman umano sapat ang bilang inihaing manifestations sa paghahabol.
- Latest
