Almazan binuhat ang Meralco sa panalo
MANILA, Philippines — Nilimitahan ng Meralco sa franchise-lowest na iskor ang Magnolia, 74-51, sa 2024 PBA Philippine Cup kahapon sa PhilSports Arena sa Pasig.
Hindi pinaporma ng Bolts ang Hoshots sa first half palang nang pagkasyahin lang ito sa 21 puntos tungo sa kumbinsidong tagumpay para sa 5-5 kartada.
Mula sa ibaba ng standings, biglang angat ngayon sa ikaanim na puwesto ang Bolts katabla ang Rain or Shine at Terrafirma.
Hawak na nila ang sariling kapalaran sa playoffs basta’t manalo sa huling laban kontra sa unbeaten na San Miguel Beer (8-0).
Naglista ng muntikang triple-double na 12 puntos, 11 rebounds at 7 assists sahog pa ang 2 tapal si Raymond Almazan habang tumapos naman si Chris Newsome 12 puntos para sa Bolts.
Nag-ambag din ng 11 at 10 puntos sina Chris Banchero at Brandon Bates, ayon sa pagkakasunod, para sa Meralco hindi nagpaiskor ng lagpas 60 puntos kontra sa kanilang karibal sa unang pagkakataon sa kanilang franchise history.
Matapos maging unang biktima ng Converge noong nakaraang linggo, lintik ang naging ganti ng Bolts nang daigin ang Phoenix at Magnolia para sa krusyal na two-game winning streak.
Nagawa nila ito nang kumaripas agad sa 35-21 abante sa halftime at hindi na muling lumingon pa nang mabaldog ang halos lahat ng tira ng Hotshots para sa pinakababa nitong iskor sa kasaysayan.
- Latest
