Kurashiki kampeon sa PVL Invitationals
MANILA, Philippines — Nailusot ng Kurashiki Ablaze ang pukpukang 19-25, 25-23, 25-19, 20-25, 15-13 panalo laban sa Creamline upang maibulsa ang korona ng Premier Volleyball League (PVL) Invitational Conference kagabi sa Philsports Arena sa Pasig City.
Kumuha ng lakas ang Japanese squad kay outside hitter Asaka Tamaru na nagpakawala ng matatalim na atake para pamunuan ang kanilang tropa sa panalo.
Nakumpleto ng Kurashiki ang matamis na 6-0 sweep sa torneo matapos walisin ang lahat ng limang laro nito sa semifinal round.
Bigo ang Cool Smashers na madepensahan ang titulo upang magkasya lamang sa runner-up trophy.
Kinapos ang Creamline sa huling sandali ng laro matapos umarangkada ng husto ang Japanese squad.
Samantala, pinatumba ng Cignal ang F2 Logistics sa bendisyon ng 25-22, 23-25, 25-20, 25-18 panalo upang masungkit ang bronze medal.
Naging matikas na sandalan ng HD Spikers sina outside hitter Ces Molina at opposite spiker Jovelyn Gonzaga katuwang si playmaker Angel Cayuna para makuha ang panalo.
Pumalo si Molina ng 19 puntos mula sa 17 attacks, isang block at isang ace habang kumana naman si Gonzaga ng 12 hits, apat na blocks at dalawang aces.
Nagdagdag naman si middle blocker Roselyn Doria ng 10 puntos samantalang may anim na nagawa si team captain Rachel Anne Daquis para sa HD Spikers.
Lamang ang HD Spikers sa attacks tangan ang 59 kills laban sa 46 ng Cargo Movers.
Nakakuha pa ang Cignal ng walong kabuuang aces kumpara sa tatlo ng F2 Logistics.
- Latest