GVIL Season 2 hahataw bukas
MANILA, Philippines — Masisilayan ang mga susunod na star spikers ng bansa sa pag-arangkada ng Shakey’s Girls Volleyball Invitational League (GVIL) Season 2 bukas sa Adamson University sa Maynila.
Pinaghalong mga pambato ng UAAP, NCAA, NCR, Luzon at Visayas ang magbibirahan sa pinalaking high school tournament tampok ang 18 teams mula sa 16-school cast lang noong Season 1 na pinagwagian ng California Academy mula sa Antipolo.
Umakyat na sa colllege ang MVP na si Caseiy Dongallo para sa UE sa UAAP subalit palaban pa rin ang California bilang isa sa paboritong koponan kasama ang UAAP girls champion at host na Adamson sa pangunguna ni MVP Shaina Nitura.
Bagama’t paborito, hindi inaasahang magiging madali ang kanilang kampanya sa presensya ng mga UAAP bets na National U-Nazareth School, UST, FEU-Diliman, UP-Integrated School at La Salle-Zobel kasama ang mga manok ng NCAA na EAC, Arellano at University of Perpetual Help.
Hindi rin pahuhuli ang regional at NCR chalengers na GVIL runner-up Naga College Foundation, bronze medalist Bacolod Tay Tung High School, Bethel Academy, Chiang Kai Shek College, La Salle-Lipa, Holy Rosary College High School, Kings’ Montesorri School at Lyceum Cavite.
Rambulan sa apat na groups ang 18 teams na Pool A (Potato Corner), Pool B (R ‘n B Tea), Pool C (Peri-Peri) and Pool D (Shakey’s) tampok ang Top 2 teams kada grupo na mamartsa sa crossover quarterfinals hangggang sa semifinals at finals.
Inaasahang pukpukan ang magiging laban ng lahat ng pambato bilang paghahanda sa kanilang mother leagues at sa Palarong Pambansa pero higit pa doon ang mithiin ng Shakeys at Athletic Events and Sports Management Inc. (ACES) para sa kinabukasan ng Philippine volleyball.
- Latest
