Michael Jordan nagpakasal uli

MANILA, Philippines - Matapos ma-engage noong December 2011, pinakasalan ng 50-gulang na si Jordan ang kanyang fiancee at dating model na si Yvette Prieto na naging kasintahan nito ng limang taon, ayon sa People.com.

Pinakasalan ng dating NBA star ang 35-gulang na si Prieto sa Palm Beach, Florida nitong Sabado.

Iniulat na may 500 katao ang dumating sakay ng mga tour bus sa Episcopal church na tinatawag na Bethesda-by-the Sea kung saan ikinasal din ang bilyonaryong si Donald Trump kay Melania noong 2005.

Nag-imbita si Jordan ng 1,500 pang katao sa kanilang reception sa Bears Club na isang golf course na idinisenyo ni Jack Nicklaus sa Jupiter, Florida kung saan nagpatayo kamakailan si Jordan ng 38,000-square-foot na bahay.

Naganap ang kasalan sa isang temporary tent na mas malaki pa sa kanyang bahay na may mga banyo rin, dance floor na may sariling lighting effects system.

Ikalawang pagpapakasal ni Jordan matapos hiwalayan si Juanita na kanyang asawa ng 17 taon na tinawag ng Forbes na pinakamahal na divorce. May tatlong anak siya rito, dalawang lalaki at isang babae.