DPWH official, driver tinambangan
MANILA, Philippines — Isang babaeng opisyal ng Department of Public Works and Highways (DPWH) at driver nito ang himalang nakaligtas sa tiyak na kamatayan matapos na tambangan at pagbabarilin ng riding-in-tandem pagsapit sa highway ng Sta. Barbara sa Iloilo kahapon ng umaga.
Kinilala ang mga biktima na sina Engineer Eva Bedonia, hepe ng Quality Assurance ng DPWH-Iloilo 4th District Engineering Office at drayber na si Rogelio Serilo Jr.
Batay sa imbestigasyon ng Sta. Barbara Police, dakong ala-7 ng umaga habang papasok na sa opisina sina Bedonia at Serilo nang biglang pagbabarilin ang kanilang pickup na sasakyan ng dalawang suspek na magkaangkas sa motorsiklo.
Limang bala ng baril ang tumama sa passenger side ng pickup kung saan nakaupo si Bedonia.
Lumilitaw pa na posibleng si Bedonia ang target sa ambush subalit sumablay ang mga suspek. Inaalam naman ng mga awtoridad ang motibo sa tangkang pagpatay sa opisyal ng DPWH.
- Latest
