Singil sa kuryente tataas

MANILA, Philippines - Kasabay ng pagtuntong ng Lunes Santo, inianunsyo na rin ng Manila Electric Company (Meralco) na magdaragdag sila ng P0.23 kada kilowatt hour na singil sa kuryente ngayong Abril. Sa abiso ng Meralco, nabatid na pasok na dito ang naunang naaprubahang P0.22 kada kWh na dagdag-singil dahil sa Malampaya shutdown noong Enero hanggang Pebrero, 2017. Dahil sa panibagong taas-singil sa kuryente, ang mga tahanang kumukonsumo ng 200kwh ay madaragdagan ng P46 sa kanilang bayarin habang ang mga kumukonsumo ng 300kwh ay kinakailangang magbayad ng karagdagang P69. Ang mga kumukonsumo naman ng 400kwh ay dagdag na P92 sa kanilang April bill habang P115 ang babalikating bayarin ng mga kumukonsumo ng 500kwh kada buwan.