Clarkson, Green Pinoy pride
MANILA, Philippines — Umukit ng kasaysayan sina Jordan Clarkson ng Utah Jazz at Jalen Green ng Houston Rockets bilang mga kauna-unahang Filipino players na nagsalo sa court ng isang NBA game sa Filipino Heritage Night sa Toyota Center, Houston, Texas kahapon.
“Jalen and Jordan made NBA history as the first two players of Filipino descent to play in the same game. It’s a historic moment,” wika ng Rockets.
Ito rin ang ibinahagi ng NBA at international media outlets sa pangunguna ng ESPN matapos ang makasaysayang NBA game para sa Pilipinas.
Sa huli, si Clarkson ang nanaig sa kanilang duwelo ni Green nang pumukol ng 16 puntos, anim na rebounds at tatlong assists sa 122-91 panalo ng Utah Jazz (4-0) sa Rockets (1-4).
“Jalen is special. I’m glad to share the moment in history. (Let’s) keep representing (the Philippines) brother,” ani Clarkson, ang reigning NBA Sixth Man of th Year.
Hindi naman nagpahuli ang rookie na si Green sa naitalang 13 puntos, tatlong rebounds, tatlong assists, isang steal at isang tapal sa kabila ng kabiguan ng Rockets.
Sinundan ni Green si Clarkson bilang kinatawan ng Pinas sa NBA matapos maging No. 2 overall pick sa 2021 NBA Rookie Draft.
Tubong Ilocos Sur ang nanay ni Green na si Bree Purganan habang galing naman sa Pampanga ang ina at lola ni Clarkson na sina Annette Davis at Marcelina Tullao Kingsolver.
- Latest
