Black Mamba uniform ang Lakers sa Game 5

LAKE BUENA VISTA, Florida — Pipilitin ng Los Angeles Lakers na makopo ang kanilang ika-17 NBA championship gamit ang Black Mamba uniform.

Isusuot muli ng Lakers ang kanilang “Black Mamba” uniforms na ginawa bilang pagpupugay sa namayapang si NBA great Kobe Bryant sa Game Five ng NBA Finals laban sa Miami Heat bukas (Manila time).

Bitbit ng Los Angeles ang matayog na 3-1 bentahe sa kanilang best-of-seven series ng Miami.

May 4-0 record ang Lakers sa postseason kapag suot ang kanilang Black Mamba uniforms, idinisenyo ng Nike katulong si Bryant.

“Mamba and Mambacita jerseys approved for game 5,” isinulat ni Vanessa Bryant sa kanyang Instagram story kagabi. “Let’s go @lakers.”

Pinahalagahan nina coach Frank Vogel, LeBron James at Anthony Davis ang “Mamba mentality” para makamit ang kampeonato.

Inialay ng buong koponan ang season para kay Bryant, ibinuhos ang kabuuan niyang 20 seasons para sa prangkisa. Isa si Bryant kasama ang kanyang anak na si Gianna sa siyam na namatay sa isang helicopter crash sa labas ng Los Angeles noong Enero.

Nagpalagay sina James at Davis ng tattoo bilang pagpupugay kay Bryant at isinisigaw ng Lakers team ang “1-2-3 Mamba!” matapos ang kanilang mga huddles.

“Obviously, we’re representing him,” sabi ni Davis. “Especially in those jerseys. It’s his jersey, one he created, and any time we put it on, we want to win.”

Unang isinuot ng Lakers ang Bryant-inspired uniform noong Enero 26, 2018 laban sa Chicago Bulls.