Herrera todo paghahanda sa Karate One Youth League

MANILA, Philippines — Pinaghahandaan na ni national karateka Raphael Herrera ang prestihiyosong Karate One Youth League na lalahukan ng mga pinakamahuhusay na batang karate athletes mula sa iba’t ibang bansa.

Sinabi ni national coach Eugene Dagohoy na malaking oportunidad ito para maipakita ni Herrera at ng iba pang Pilipinong karateka ang kanilang kakayahan sa international stage.

“Mahalaga ang Karate One Youth League dahil dito makakakuha ng ranking points para sa world rankings,” ani Dagohoy sa Tabloids Organization in Philippine Sports, Inc. (TOPS) Usapang Sports forum kahapon sa PSC Conference Room.

Mahalaga rin ang ranking points bilang bahagi ng qualification process patungo sa Olympic Games.

Isa ang 12-anyos na si Herrera, graduating Grade 6 student sa Abba's Orchard School, sa mga inaasahang susunod na bituin ng Philippine karate.

Sinabi ni Herrera na inspirado siyang magsanay nang mabuti upang maipagmalaki ang Pilipinas sa international competitions.

“I’m training very hard every day because I want to improve my skills and make my family and coaches proud,” sambit ni Herrera sa forum na itinataguyod ng Philippine Sports Commission Behrouz Persian Cuisine at Pocari Sweat.

“I know the competition will be tough, but I’m excited to compete against strong athletes from other countries.”

Nakatuon ngayon ang training ni Herrera sa pagpapahusay ng kanyang kata routines, consistency, disiplina at mental preparation bago sumabak sa world-level competition.

Ibinahagi naman ng kanyang ama na si movie actor RR Herrera na hindi madali ang pagsabayin ang pag-aaral at matinding ensayo bilang isang student-athlete.

“Our support is vital for our child’s success. Of course, it can be expensive, but it is worth it once you see them happy and successful in the sport they love,” ani Herrera.

Sinabi rin ni Herrera na inspirasyon niya ang mga international karate athletes kaya lalo siyang ginaganahang magsanay.

”I watch videos of top karate players and I try to learn from them,” wika ni Herrera. “Someday, I want to compete regularly in international tournaments and represent the Philippines in bigger competitions.”

Nagkuwalipika si Herrera sa Karate One Youth League matapos manalo ng gintong medalya sa kata intermediate division sa ginanap na National Open noong nakaraang buwan sa Tagaytay City.

Noong nakaraang taon, nakakuha rin siya ng bronze medal sa 2nd Asian Youth Open Karate Championships sa China at nagwagi rin ng gintong medalya sa Batang Pinoy sa General Santos City.

Matapos ang Karate One Youth League, target naman ni Dagohoy na ihanda si Herrera para sa Thailand Open sa Agosto, Southeast Asian Championships at fourth leg ng Karate One Youth League sa Italy sa Disyembre.

Nagpasalamat din si Dagohoy sa Philippine Sports Commission at sa karate federation dahil sa pagbibigay ng oportunidad sa mga atletang Pilipino na makalaban ang world-class athletes nang hindi kinakailangang gumastos nang malaki para makapaglaro abroad.