Lakers ni LeBron sud sa playoffs, Warriors ni Curry natagak

CEBU, Philippines — Si LeBron James ug ang Los Angeles Lakers milatigo sa New Orleans Pelicans, 110-106, aron pag-angkon sa gihandum nilang luna sa NBA playoffs.

Ang four-time NBA champion nga si James mi-iskor og 23 puntos uban ang siyam ka rebounds, siyam ka assists ug tulo ka steals sa kadaogan nga naghatud sa Lakers isip No7 seed sa West.

Nakakuha siya og dakong suporta gikan ni D'Angelo Russell nga miposa og lima ka 3-pointers sa iyang 21 puntos ug ingon man ni Anthony Davis nga mipupo og 20 puntos ug 15 ka rebounds.

Dili pa hinoon makaselebrar og todo ang Lakers gumikan kay ilang banggaon sa unang hugna mao man ang defending champion Denver Nuggets.

Ang duha maoy nag-abot sa miaging Western Conference finals diin gi-sweep sa Nuggets ang Lakers, 4-0, sa ilang best-of-seven series.

Si Zion Williamson maoy nangu sa Pelicans bitbit ang 40 puntos. Siya maoy nangu pagpabangon sa iyang koponan human malubong og 18 puntos apan wala makatiwas og duwa kay na-angol sa katapusang tres minutos sa aksiyon.

Duna pa hinooy tsansa ang Pelicans sa dihang ilang sangkaon ang Sacramento Kings alang sa ikawalo ug katapusang luna sa West playoffs.

Ang Kings buhi pa human gipalagpot si Stephen Curry ug ang Golden State Warriors, 118-94.

Si Keegan Murray mipabuhagay og 32 puntos alang sa Kings. Si De'Aaron Fox mitali og 24 samtang si Domantas Sabonis miamot og 16 puntos ug 12 ka rebounds.

Bugnaw kaayo ang opensa ni Curry sa sinugdanan diin siya mipugnit lamang og singko puntos sa first half. Mitapos siya uban ang 22 puntos apan si Klay Thompson nangitlog human masipyat sa tanan niyang 10 ka itsa.

Ang makapadismaya nga kapildihan nagbutang og dakong pangutana kabahin sa ugma sa dekalibreng trianggulo sa Warriors nga sila si  Curry, Thompson ug Draymond Green, ang mga haligi sa dinastiya nga nakalangkat og mga titulo niadtong 2015, 2017, 2018 ug 2022.