Pinoy long-jumper nanghakot og bulawang medalya sa Uropa
CEBU, Philippines — Laing atletang Pilipino ang nanghakot og bulawang medalya nga mao ang long jumper nga si Janry Ubas sa nagpadayong Triveneto Meeting Internazionale sa Trieste, Italy niadtong Sabado.
Si Ubas mao ang Southeast Asian Games gold medalist nakahimo og 7.72 meters aron labwan ang 13 ka mga atleta gikan sa nagkalainlaing nasud, apil niini ang Tokyo Olympian nga si Lester Lescay Gay sa Cuba kinsa maoy nakasakmit sa silver medal. Ang Botswanian nga si Thapelo Monaiwa sab maoy misakmit sa bronze medal pinaagi sa iyang 7.54m.
Ang 29-anyos nga lumad nga taga Misamis Oriental nakahimo sab og 7.86m aron pagsakmit sa bulawang medalya sa laing kompetisyon nga gihimo didto sa Motonet Grand Prix sa Lappeenranta, Finland pipila ka adlaw sa wala pa siya mo-compete sa Italy.
Ang paningkamot ni Ubas nakapasaka sa iyang tsansang makaapil sa 36 spots nga gitugot para makaapil sa World Championships nga mahitabo karong Agusto 19-27 sa Budapest, Hungary diin iyang makauban silang EJ Obiena ug hurdler Robyn Brown. Si Ubas nabutang karon sa ranked No. 53 sa kalibotan ug gipaabot nga mosaka kini sa pagpadayon pa niyang pagsalmot sa uban pang kompetisyon sama sa Stuttgart sa Germany nga miimbitar kaniya sa pag-apil.—IBM
- Latest
