PBA governors’ cup dedesisyunan sa susunod na lingo
Itutuloy o kanselado na?
MANILA, Philippines — Malalaman sa susunod na linggo ang desisyon ng PBA Board para sa natenggang 2021-2022 Governors’ Cup sa gitna ng paglobo ng mga kaso ng coronavirus disease (COVID-19) sa bansa dahil sa Omicron variant.
Nagpasya ang PBA Board na suspindehin ang mga laro ng nasabing import-reinforced conference nang sumirit ang mga COVID-19 cases sa National Capital Region (NCR) at mga karatig probinsya.
“Madedesisyunan na iyan next week. Nagpatawag na ng board meeting si Chairman (Ricky Vargas),” wika kahapon ni PBA Commissioner Willie Marcial sa online session ng Philippine Sportswriters Association (PSA).
“By next week malalaman na kung itutuloy o hindi, ano ba ang balak, hihintayin ba nating bumaba (ang COVID-19 cases),” dagdag nito.
Inihayag ng liga ang pansamantalang pagpapaliban sa mga laro ng Governors’ Cup pati ang mga team scrimmages noong Enero 6 nang sumipa ang mga COVID-19 cases sanhi ng Omicron variant.
Huling naglaro ang PBA noong Disyembre 26 na may limitadong live audience sa Smart Araneta Coliseum.
Inendorso na ni Games and Amusements Board (GAB) chairman Abraham ‘Baham’ Mitra sa Inter-Agency Task Force (IATF) ang pagpapatuloy ng PBA sa kanilang torneo sa isang home-venue-home set-up.
“From there, titingnan natin. May mga kakausapin din tayo at kokonsultahin,” sabi ni Marcial.
Ginamit ng liga ang nasabing set-up nang maglaro sa Ynares Sports Arena sa Pasig City noong 2021 Philippine Cup na inilipat sa semi-bubble sa Bacolor, Pampanga dahil sa pagtaas ng COVID-19 cases sa NCR.
“Pero iyon nga ang sinasabi ko, kapag lumabas ba tayo (ng NCR), nag-bubble tayo sa labas sigurado ba tayong hindi rin tatamaan? Iyon pa ang isang pinangangambahan namin,” ani Marcial. “Pero sigurado pag-uusapan iyan (sa Board meeting).”
- Latest