Harold's Hotel midaog gyud
CEBU, Philippines – Midaog gyud ang Harold's Hotel bisan pa sa mga pagsuway nga ilang naagian.
Ang Harold's Hotel ni Arnel Trinidad nakaipsot sa ligas kaayo nilang duwa sa Nevaeh Sales Trading ni Jofel Tejada, 87-85 niadtong Martes sa nagpadayong aksiyon sa FYA Basketball Tournament Season 23 Yoyi's Pastries & Desserts Cup 2019 didto sa Atillo gym sa Labangon, Dakbayan sa Sugbo.
Sa sayo pa, ang Yoyi's Pastries & Desserts ni Ahlmark Albarracin midaog human ma-'forfeit' ang EJ & Ejean nga gipaluyohan ni Baeng Medalle.
Ang best player nga si Ryan 'The Skycraper' Dacayana mikolekta og 19 puntos, milangkat og 12 ka rebounds, lima ka assists ug upat ka blocks aron pangulohan ang Harold's Hotel nga nagsolo sa ikatulong dapit sa ilang 4-1 win-loss record.
Dako sab og natampo sila si Ava Flores, Nene Billones, McLain Alkuino ug Jade Ursal nga parehong miiskor og double figures.
Ang Nevaeh gipangulohan ni Emman Reubal nga mikadlit og 20 puntos, gisundan sa team manager niining si Jofel Tejada sa iyang 17 puntos.
Sila si Val Ramirez ug Noel Medalle mitampo'g 14 ug 11 puntos sa napildeng Nevaeh Sales Trading nga nagbitbit og 4-3 nga baraha.
PUNTOS MATAG USA
HAROLD's Hotel (87) – R. Dacayana 19, A. Flores 16, Billones 14, Alkuino 13, Ursal 12, Arnado 6, J. Cabañez 5, Celestial 2.
NEVAEH (85) – Reubal 20, Tejada 17, Ramirez 14, N. Medalle 11, T. Marata 9, Dela Peña 8, Demol 4, T. Abella 2.
- Latest
