Perpetual Help amoy na ang triple crown

MANILA, Philippines — Tuloy ang pananalasa ng University of Perpe­tual Help System Dalta matapos pagbagsakin ang reigning champion Arellano University, 21-25, 25-17, 25-21, 25-20 para makadikit sa inaasam na korona sa NCAA Season 94 women’s volleyball tournament kahapon sa The Arena sa San Juan City.

Naasahan ng husto ng Perpetual Help sina Cindy Imbo at Hannah Suico para hablutin ang 1-0 lead sa best-of-three finals.

Malakas din ang depensa ng Lady Altas sa pangunguna nina Shyra Umandal, Jenny Gaviola at Jhona Rosal na gumawa ng importanteng blocks sa huling tatlong sets habang maganda ang inilaro ni playmaker  Necelle Gual na may 23 excellent sets para manduhan ang opensa ng tropa.

Naging pasakit naman sa panig ng Lady Chiefs ang kaliwa’t kanang errors nito partikular na sa service area habang nalimitahan din ang produksiyon ni dating Rookie of the Year awardee Necole Ebuen na siyang gumawa ng attack error sa fourth set para ibigay sa Lady Altas ang panalo.

Tanging si Season 93 Finals MVP Regine Anne Arocha ang nagsilbing liwanag ng Arellano nang kumana ito ng 16 puntos.

Magkakaroon ng tsansa ang dalawang koponan na makapag-recharge dahil lalaruin ang Game 2 sa Peb­rero 8 sa parehong venue.

Sa men’s division, nakadikit din sa korona ang Perpetual Help matapos itakas ang pahirapang 23-25, 25-20, 23-25, 25-23, 15-12 panalo laban sa College of Saint Benilde sa Game 1 ng kanilang sariling best-of-three finals.

Nangibabaw si reig­ning MVP Joebert  Almodiel nang pumalo ito ng 21 puntos habang nagbigay ng solidong kontribusyon si Ronniel Rosales na may 19 hits.

“Hindi ako satisfied sa performance namin dahil iba ang laro nila sa training at tuneup games. Siguro dahil finals na kaya sinabi ko lang sa kanila na mag-relax,” ani Perpetual Help head coach Sammy Acaylar.

Sa juniors, inilampaso ng Perpetual Help ang Colegio de San Juan de Letran, 25-15, 25-19, 25-19 para makalapit sa five-peat.