Davison inilapit PLDT sa semis

MANILA, Philippines — Inilapit ng PLDT ang sarili para sa semifinals spot matapos talunin ang talsik nang Galeries Tower, 25-13, 25-23, 23-25, 25-18, sa 2026 Premier Volleyball League (PVL) All-Filipino Conference Siklab Series kahapon sa Philsports Arena sa Pasig City.

Kumolekta si Fil-Canadian Savi Davison ng 21 points at 16 excellent receptions at may tig-10 markers sina Kim Kianna Dy at Dell Palomata.

“Going into this match, we needed to stay aggressive, we needed to be stable, and, you know, this gives us some momentum heading into our last game against Choco (Mucho),” ani Davison.

Ang bounce back win ng High Speed Hitters ang nagtaas sa kanilang baraha sa 4-3 para makasosyo ang Choco Mucho Flying Titans sa third spot sa agawan sa natitirang tatlong semis ticket.

Ang Nxled Chameleons (6-0) ang unang nakasampa sa semis.

Laglag ang Highrisers sa 1-6 marka bagama’t nakahugot kay Erika Deloria ng 13 points at 15 excellent receptions, habang may 11 markers si Jean Asis.

Matapos kunin ng PLDT ang 2-0 bentahe sa laro ay naagaw ng Galeries Tower ang third set, 25-23, sa likod nina Deloria, Asis, Aiza Maizo-Pontillas at Jade Gentapa.

Ipinoste ng High Speed Hitters ang 10-2 lead sa fourth set bago nakalapit ang Highrisers sa 12-16.

Hindi na nagpabaya ang PLDT at tuluyan nang tinapos ang laro sa pamamagitan ng isang crosscourt winner ni Jessa Ordiales.

Samantala, tinalo ng Farm Fresh ang Capital1 Solar Energy, 25-17, 25-21, 23-25, 25-23 sa huling laro.