UV napakyas apan mapasigarbuhon

CEBU, Philippines — Ang University of the Visayas SBP team mipakita og maayong labok tibuok duwa apan dili igo ang ilang panglimbasog hinungdan nga giusban sila og parot sa La Salle Greenhills, 52-48, sa kulbahinam kaayo nilang kampiyonato sa national finals sa 33rd SBP Passerelle Twin Tournament nga gipaluyohan sa Milo niadtong Domingo didto sa University of the Assumption sa San Fernando City, Pampanga.

Unang naglabaw ang UV sa iskor nga 18-14 apan miresbak ang La Salle sa ikaduhang kuwarter hinungdan nga mao na kini ang mi-abante og usa ka lugas sa halfttime, 28-27.

Ubos sa liderato ni Michael Cortez, misamot pa ang kainit sa Greenies sa ikatulong kuwarter hinungdan nga gi-inat ang ilang labaw ngadto na sa siyete puntos, 44-37.

Apan wala sad magpabitin ang UV pinaagi nilang Kenneth Cole, Khian Panerio ug Neil Sinoy nga nagkumbinar og puwersa aron pagpasikit sa mga Sugbuanon ngadto sa 50-48 sa nahibiling 1:21 sa duwa.

Mao ra hinoon kadto ang labing nindot nga nahimo sa UV gumikan kay si Lorenzo Hizon mipasud sa krusyal niyang tira nga silyohan ang ikaupat ka sagunson nga titulo sa La Salle.

Pildero man tuod ang UV apan angayan gihapon nga ibayaw kay bisan og mas mubo ug mas gamay sila sa tapad ilang gipakuratan sa kanunay ang mas dagko ug mas tag-as nilang karibal.

Mismo ang coach sa La Salle nga si Justin Tan ang misaludo sa gipakitang kadasig sa UV.

“Galing nila. We really had a hard time dealing with the scrappiness of UV, but our leaders also stepped up to the challenge,” dason pa ni Tan.

Sa iyang bahin, si UV coach Ronald Bucao nagkanayon nga mapasigarbuhon kaayo siya sa iyang mga sakop bisan tuod og napakyas sila.

“Nothing to be ashamed of. We are proud of the boys for showing that we can match up with the best teams from Manila,” kanayon pa ni Bucao. (BANAT NEWS)