Cabaron cup basketball: Samboan mikulit sa ikatulong daog
![Cabaron cup basketball: Samboan mikulit sa ikatulong daog](https://media.philstar.com/photos/2024/04/25/samboan_2024-04-25_00-13-52.jpg)
CEBU, Philippines — Nagtambayayong sila si Earfly Matthew Dimol ug Maico Gelacio aron aswaton ang Samboan ngadto sa 82-72 nga pagpalukapa sa Boljoon sa nagkainit nga aksiyon sa Mayor Inocentes Cabaron Invitational Inter-Town Basketball Tournament didto sa Moalboal covered court sa lungsod sa Moalboal, habagatang bahin sa Sugbo.
Si Dimol mitali og 23 puntos, samtang si Gelacio midugang og 21 puntos alang sa Samboan, nga padayong nagsolo sa ikaduhang puwesto sa Group B uban a 3-1 rekord. Usa ka duwa lamang ang ilang gintang sa Dalaguete nga nagkupot og perpektong 4-0 nga marka.
Alkansi ang Samboan og usa ka lugas, 19-20, human sa unang bahin sa ilang sangka, apan si Gelacio mibomba og tulo ka tres sa iyang 13 puntos sa ikaduhang kuwarter nga nakapa-abante kanila og singko puntos, 39-34, sa halftime.
Si Kenjie Gumera nagmangtas sa kampo sa Boljoon sa ikatulong kuwarter apan si Dimol nanginit sa pinal nga 10 minutos sa aksiyon diin siya mirapido og 13 puntos aron giyahan ang Samboan ngadto sa 10 puntos nga kadaogan.
Si Tope Tanato mihipos og 16 puntos, samtang sila si Gumera ug Epoy Cañeda nagkumbinar og 24 puntos sa pilderong Boljoon.
Sa laing bahin, ang Barili mipiog sa Alcantara, 81-75, aron inaton ang ilang baraha ngadto sa 2-1.
Naglabaw unta ang Alcantara og 14 puntos, 28-14, apan mikolapso sa naghinapos nga bahin sa duwa hinungdan nga nakatilaw sa ikalima nilang sagunson nga pilde.
Si Jumil Bayang mipupo og 21 puntos samtang si Jomar Ravanta adunay 10 puntos sa dihang gipahayagan sa Barili ang ilang tsansa nga makasud sa semis.
Si John Kevin Macasaol mikadlit og 23 puntos samtang si Randy Canedo midugang og 12 puntos apan nakawang ang ilang paningkamot alang sa Alcantara.
- Latest