UV mibira SBP title, SHS-Ateneo pakyas
CEBU, Philippines — Nakasugakod ang University of the Visayas (UV) sa sikit nga kumbati batok sa St. John's Institute-Bacolod ug nakaeskapo bitbit ang 56-52 nga daog aron mahimong kampiyon sa SBP division sa Visayas regional finals sa 33rd SBP Passerelle Twin Tournament nga gipaluyohan sa Milo kagahapon didto sa Bacolod Tay Tung High School, Bacolod City.
Nagpabiling madasigon ang UV ni coach Ronaldo Bucao taliwala sa makabungol nga abiba sa mga dumadapig sa ilang mga karibal.
Tuod man, daw nawala sa ilang pokus ang UV hinungdan nga ang St. John’s miabante sa halftime, 29-24.
Apan miresbak ang UV pinaagi ni Marc Abangan nga mitali og nuybe sa iyang 11 puntos atol sa rally sa ikatulong kuwarter nga naka-palabaw kanila og 45-38 sa nahibiling 10 minutos sa duwa.
Giinat pa sa UV ang ilang labaw ngadto sa 10 puntos, 48-38 human sa tres ni Neil Sinoy, apan ang St. John's miataki hinungdan nga nakasikit kini sa iskor nga 54-50 sa nahibiling dos minutos sa aksiyon.
Apan sila si Khian Panerio ug Kenneth Cole milansang og krusyal nga mga free throws sa final 1:42 sa kulbahinam nga engkuwentro aron pagpaginhawa og lawon sa UV.
Miabag ni Abangan sila si Sino ug John Baring nga nagkumboya'g 17 puntos.
Dili hinuon tanan kalipay ang nahiaguman sa Team Cebu gumikan kay ang Sacred Heart School-Ateneo de Cebu gipilde sa St. Robert's International Academy sa Iloilo, 58-66 sa kampiyonato sa Passerelle division. (BANAT NEWS)
- Latest
