Tulo naka-triple gold sa 2016 Batang Pinoy
CEBU, Philippines - Tulo ka mga batan-ong atleta ang mihimo og impresibong performance sa 2016 Batang Pinoy National Championship kagahapon didto sa DavNor Sports and Tourism Complex sa Tagum City.
Ang pambato sa Cebu Province nga si Moira Frances Erediano padayong mipakita sa iyang abilidad diin mikabkab siya og bulawan nga medalya sa duathlon event ubos sa girls 11-12 division. Gitapos niya ang lumba sa oras nga 25.10 minutos.
Si Erediano maoy unang naka-gold atol sa opening niadtong Domingo pinaagi sa cycling criterium, nasundan og laing daog sa triathlon niadtong Lunes.
Sa ilang bahin, sila si Maenard Batnag sa Baguio City ug Christian Paul Anor sa Banganga, Davao del Sur midaog sab og tulo ka golds sa tagsa-tagsa nila ka dibisyon sa swimming event.
Si Batnag miharos sa gold medals sa 200m, 100m backstroke ug 200m butterfly sa 12-under class, samtang si Anor sa 100m, 200m backstroke ug 100m freestyle sa 13-17 division.
Sa laing bahin, si Dino Singson sa Team Cebu City misakmit og gold medal sa weightlifting ubos sa boys 30 kg. division. (BANAT NEWS)
- Latest