Systema vs IEM sa preview ng kanilang titular showdown
Laro Ngayon
4 p.m. Systema vs IEM
6 p.m. Meralco vs Cagayan
MANILA, Philippines - Paglalabanan ng Systema Active Smashers at Instituto Estetico Manila Volley Masters ang pangunguna sa kalalakihan habang magkaroon ng momentum papasok sa finals sa kababaihan ang nais ng Cagayan Valley Lady Rising Suns sa pagtatapos ng Shakey’s V-League Season 11 Third Conference elimination round ngayon sa The Arena sa San Juan City.
Ang tagisan ng Systema at IEM ay magsisimula sa ganap na alas-4 ng hapon at momentum din ang hahawakan ng papalaring koponan dahil ang dalawang teams na ito ang siya ring magkikita sa kampeonato sa ligang inorganisa ng Sports Vision katuwang ang Shakey’s at suportado ng Accel at Mikasa.
Nakauna ang Volley Masters sa unang pagtutuos na umabot sa limang sets kaya’t magpupursigi ang Power Smashers para maitabla ang karta at tiyaking balikatan ang magaganap sa best-of-three finals na magsisimula na sa Linggo.
Sa kabilang banda, gagamitin ng Cagayan ang laro kontra sa Meralco Power Spikers na mapapanood dakong alas-6 ng gabi, para mapagtibay ang laban kontra sa mainit at nangunguna sa kababaihan na Army Lady Troopers.
Tinalo rin ng Cagayan ang Meralco sa unang pagkikita ngunit asahan na ibibigay ng Power Spikers ang lahat ng kanilang makakaya para makatikim ng panalo bago mamaalam sa liga.
May limang sunod na talo ang Power Spikers upang lumabas na natatanging koponan na hindi pa nananalo sa liga. (ATan)
- Latest
