Chiefs magpapasolido sa No. 2 vs Blazers
MANILA, Philippines - Susukatin uli ang tibay ng pumapangalawang Arellano Chiefs sa pagharap sa mainit na St. Benilde Blazers sa 90th NCAA men’s basketball ngayon sa The Arena sa San Juan City.
May 6-2 baraha ang Chiefs at kung madagdagan pa ang panalo sa larong itinakda dakong alas-4 ay didikit ang koponan ng kalahating laro sa nangungunang San Beda.
Unang laro sa ganap na alas-2 ng hapon ay sa hanay ng host Jose Rizal University Heavy Bombers at Emilio Aguinaldo College Generals.
Magkasalo ang Bombers, Blazers at pahingang Perpetual Help sa ikatlong puwesto sa 4-3 karta kaya’t pupukpok nang husto ang unang dalawang koponan para manatiling okupado ang posisyon.
Galing ang bataan ni coach Vergel Meneses sa 99-98 triple-overtime panalo sa Arellano at ito ang sasandalan nila upang ipantapat sa Generals na pinutol ang five-game losing streak sa 89-78 tagumpay sa Mapua Cardinals noong Lunes.
Nakabangon ang tropa ni coach Jerry Codiñera sa pagyuko sa Bombers sa dikitan ding 63-62 panalo sa Letran noong Lunes.
Patuloy na nagbibigay ng magandang numero ang starters ng Chiefs sa pangunguna ni Keith Agovida.
Ngunit para manalo, nakikita ni Codiñera na dapat na magpamalas ng magandang depensa at pigilan ang ‘big three’ ng Blazers na sina Mark Romero (15.71 puntos), Paolo Taha (13.43 puntos) at Jonathan Grey (11.57 puntos).
Bukod sa tatlong Blazers, hangad ni Benilde coach Gabby Velasco na magpatuloy ang suporta ng kanyang bench para may ibang option sakaling mabantayan nga ang kanyang mga inaasahan.
- Latest
