Cebu Niños "virtual champs' sa CVIRAA

CEBU, Philippines - Gisaulog nang daan sa Cebu City Niños ang lain nilang dakung  kadaugan bisan og aduna pay ipahigayon nga championships karong adlawa gumikan kay sila na ang "virtual champs" sa Central Visayas Regional Athletic Association (CVIRAA) Regional Meet kagahapon nga kasagarang giduwa diha sa Cebu  City Sports  Center (CCSC).

 Mihakot og laing puntos ang Cebu Niños gikan sa lima ka sporting events.

 Human midominar sa swimming, ang Cebu Niños  nanghawod sab sa taekwondo nga midaog og siyam ka golds ug usa ka silver sa secondary division. Naka-gold  sab ang Niño sa rhythmic gymnasts sa pagpangulo ni Milo Little Olympics best gymnasts Daniela Reggie Dela Pisa ug teammate Marianne Alegado.

 Ang Niños nakakuha sab og  puntos sa archery ug dugang 25 puntos sa ilang pagdaog sa secondary girls' softball batok sa Cebu Province, 7-0. Nidaog sab og bulawan ang Niños sa secondary girls' volleyball batok gihapon sa Cebu Province sud sa tulo ka sets, 25-14, 25-7, 25-21, samtang ang Mandaue miangkon sa bronze human gipilde ang Lapu-Lapu, 25-23,25-20.

 Nakapuntos sab ang Niños sa table tennis kortesiya ni Diana Oliverio nga mipukan sa iyang teammate nga si Athena Comaingking, 9-11, 11-7, 14-12, 11-9.

 Lisud na kaayo apason ang Cebu Niños dihang gipalawman pa ang ilang labaw 279 puntos nga layo kaayo'g biya sa nagsunod nga Mandaue City, kinsa mipupo og 124.5 puntos sa overall standings. Ang Cebu Province mihipos og 101 puntos alang sa ikatulong puwesto, samtang ang Talisay City nahimutang sa ikaupat sa ilang 73 puntos ug ang Dumaguete City mikapyot sa ikalima nga miani'g 52 puntos.

 Ang Bohol mihipos og 47 puntos alang sa ikaunom nga dapit, gisundan sa Tagbilaran nga adunay 38.67 puntos, Lapu-Lapu sa ilang 24.17 puntos, Negros Oriental nga mihipos og sayes puntos,  Toledo  sa ilang 3.67 puntos ug  Danao ug Naga nga pulos mikutlo'g 2.5 puntos. (BANAT NEWS)