Kinamangay na

CEBU, Philippines - Dili na gyud kapugngan, magsukmagay na gyud sila si Milan Melindo ug Venezuelan Jean Piero Perez sa main event sa "Pinoy Pride XVI: Venezuelan Invasion" karong gabii diha sa Waterfront Cebu City Hotel and Casino.

Ipamatuod ni Melindo (27-0, 11KOs) nga angayan na siya alang sa world title shot sa sunod tuig sa dihang ang walay pildeng ALA Boxing Gym star modepensa sa iyang WBO International flyweight title batok ni Perez (19-4, 14KOs). 

Si ALA Boxing Gym big boss Antonio 'Bidoy' L. Aldeguer miingon nga kini na ang tukmang panahon alang ni Melindo nga ipakita ang tanan niyang abilidad batok sa delikado ug dekalibreng kaatbang.

"Pwede unta mi mokuha og sayon nga kontra para ni Milan, but we want to prove that he really is a number world title contender," matud pa ni Aldeguer. "This is a very crucial and important fight for Milan because this will strengthen his hold of the No. 1 spot that will help us get a world title fight next year."

Silang Melindo ug Perez yano kaayong mikuha og 112 pounds weight limit atol sa official weigh-in kagahapon didto sa The Event Centre sa SM City-Cebu.

Ang 24-anyos nga si Melindo misaad og kulbahinam nga sangka ug nagtuo siya nga adunay "knockout" nga mahitabo. 

"Nindot ni kay puros mi counter-puncher, gamay'ng sipyat naa gyud matumba, pero segurado ko nga dili ako ug siya maoy mo-kiss sa sawog sa ring."

Sama ni Melindo, si Rocky 'The Road Warrior' Fuentes (33-6, 22KOs) misaad usab og "knockout" nga kadaugan sa pagdepensa niya sa iyang OPBF flyweight title batok sa Japanese based-South Korean nga si Myung Ho Lee (15-1, 5KOs).

Sa undercard, si Arthur 'El Matador' Villanueva (19-0, 12KOs) mosukod sa abilidad sa beteranong si Pramuansak Posuwan (45-4, 24KOs) sa Thailand.

Mokumpleto sa fight card mao ang sangka nila ni Welbeth Loberanis batok Jovel Romasasa, Mark Acub batok Ryan Maano, Reymund Tabogon batok Rowell Garcia ug Bryan Lobitania batok Steve Noblefranca.  (BANAT SPORTS)