Painters, Texters magtigi sa hoops dome

CEBU, Philippines - Kumpiyansa kaayo si Rain or Shine Elasto Painters coach Yeng Guiao nga makalingkawas sila gikan sa peligro nga sitwasyon   batok sa Talk N' Text Tropang Texters sa PBA out-of-town game karong alas-6:45 sa gabii didto sa Hoops Dome sa Brgy. Gun-ob sa Lapu-Lapu City.

"Witness a fast game tonight and magiging battle of guards ang laro" sumala pa ni Guiao   atol sa   press conference kagahapon didto sa Mooon Café sa Insular Square sa Brgy. Basak, Mandaue City.

Sumala pa ni coach Guiao, wala sila magduda sa ilang katakus nga mopukan sa Tropang Texters bisan pa'g kuwang sila sa gitas-on, apan adto kini nila bawion sa gikusgon.

Giangkon niya nga mas daku ang bench sa Tropang Texters, apan masagang kini nila kun mag-igo sila sa gawas. Matud pa niya nga sa miaging duha ka duwa, nabalikan sa ilang mga tirada sa gawas silang Jeff Chan ug Paul Lee, apan iyang giangkon nga lupig gyud sila sa poste tungod sa kadaghang tag-as sa rotation sa ilang kontra sama nilang Japeth Aguilar, Kelly Williams, Harvey Carey ug Ranidel de Ocampo.    Dili pa hinuon makaduwa si Ali Peek tungod sa piang sa iyang tuong kamot.

Nagkanayon si Guiao nga miubos og maayo ang ilang moral dihang natagak sila sa semifinals batok sa Powerade Tigers sa miaging conference.

Kini ang katapusang duwa sa Rain or Shine ug paningkamotan nila nga modaog aron magpabiling buhi ang ilang paglaum nga moabante sa playoff.

Sa habig sa Tropang Texters, ang ilang assistant coach nga si Jamike Jarin nagkanayon nga mas nakabentaha sila sa championship experience ug tumong nila karon nga moabante sa playoff uban sa giya sa ilang import nga si Donnel Harvey.

Gawas ni Jarin, mitambong sab sa press con ang team manager nga si Bong Ravena, liaison officer Eddie dela Paz ug mga players nga sila si Aguilar, Peek, Rich Alvarez, Gilbert Lao, Bambam Gamalinda ug Pamboy Raymundo.

Sa Rain or Shine, ang nitambong mao ang Sugbuanong player nga si Joseph Ronald Quiñahan, ang produkto sa University of the Visayas (UV) Green Lancers gikan sa Mandaue uban nilang Gabe Norwood, Beau Belga, Jireh Ibañez, Ryan Araña ug Tyronne Tang.  (BANAT SPORTS)