Cebuana kontra sa Boracay ngayon
MANILA, Philippines - Ikaapat na sunod na panalo na magpapatibay sa paghahabol sa outright berth sa semifinals ang nakataya sa Cebuana Lhuillier sa pagbangga sa Boracay Rhum sa PBA D-League Aspirants’ Cup ngayon sa San Juan gym.
Mas lumalim ang Gems na haharapin ang Waves sa tampok na laro sa alas-4 dahil sa pagsalang ng mga 6-foot-7 centers na sina Raymond Almazan at Yousef Taha.
Balik Cebuana Lhuillier si Almazan matapos lumiban sa huling tatlong laro dahil kinailangan siya ng Letran sa PCCL, habang si Taha ng Mapua ay binigyan na ng sertipikasyon mula sa Bureau of Immigration and Deportation (BID) para maisuot sa unang pagkakataon ang uniporme ng Gems.
Ito naman ang huling laro ng Waves sa eliminasyon at nais nilang sungkitin ang ikapitong panalo sa 10 laro na hindi lamang magpapatatag sa puwesto sa quarterfinals kundi magiging palaban pa sa insentibong ibibigay sa mangungunang dalawang koponan.
- Latest
- Trending