FC Fortune, Allyn & Sons sud semis sa Power Forty

CEBU, Philippines - Gitagak sa mga underdog teams FC Fortune ug Allyn & Sons ang ilang tagsa-tagsa ka kaatbang atol sa Power Forty Christmas League basketball tournament niadtong Martes didto sa Inayawan Sports Complex.

Ang FC Fortune midaog batok sa mas paboritong Park ‘N  Go Bakeshop sa iskor nga 81-79, samtang ang Allyn & Sons mipilde sa Water Market, 92-84.

Sa maong kadaugan, ang FC Fortune ug Allyn & Sons parehong miabante sa semifinals. Ilang sangkaon ang laing lig-ong nga karibal sa knockout games karong Disyembre 13.

Ang fourth seed nga Allyn & Sons makigsangka sa no. 1 UTASSCO Utility ug ang third seed FC Fortune makigbangga sa no. 2 seed Van System.

Ang modaog maoy mag-abot sa finals unya sa Disyembre 20, samtang ang mapilde maoy mag-ilog sa ikatulong puwesto.

Si Teddy Ebrado mibahog og 20 puntos ug si Gogo Fuentes midugang og 15 puntos alang sa FC Fortune. Ang team owner nga si Chino Kalinga ug Nestor Javierto nagkumboya og 24 puntos

Ang Park N' Go gipangulohan ni Michael Arias, kinsa mipabuto og 28 puntos, samtang sila si Domie Ozon, Mardy Echavez ug Tata Pestaño mirehistro sab og double figures.

Sa laing duwa, sila Carding Bernaiz, Gideon Bughao ug Adot Tabar miiskor og kapin 20 puntos matag usa aron giyahan ang Allyn & Sons. 

Ang Water Market gipangulohan ni Jun Nacional pinaagi sa iyang 16 puntos, gisundan ni Edwin Dejacto sa iyang 15 puntos ug Alan dela Rama nga adunay 14 puntos.

PUNTOS MATAG USA

Unang duwa:

FC Fortune (81) - Ebrado 20, Fuentes 15, Kalinga 13, Javierto 11, Piezas 9, Lim 6, Navares 3

Park ‘N Go (79) - Arias 28, Ozon 17, Echavez 14, Pestaño 13, Filosopo 6, Rama 2

Ikaduhang duwa:

Allyn & Sons (92) - Vernaiz 26, Bughao 23, Tabar 21, Lisondra 11, Moniva 7, Arnado 4

Water Market (84) - Nacional 16, Dejacto 15, Dela Rama 14, Ungria 10, Dumale 10, Eleguin 6, Abellana 6, Flordeliza 5, Mabalcon 2, Labajo 2  (BANAT SPORTS)