Koko Pingoy ug Oping Sumalinog, sa Sugbo naghatag og dungog

CEBU, Philippines - Dili na bag-o alang kanato nga dunay mga basketball players gikan sa Sugbo o gikan sa laing lugar sa Visayas ug Mindanao nga adto mokulit og pangalan didto sa Manila ug didto sila mahimong inila o sikat nga players.

Sa ako lang nahinumdoman, lakip na niini mao silang Dale Singson ug Cyrus Baguio. Parehong Bisaya, parehong produkto sa University of Sto. Tomas ug parehong nakaduwa sa PBA.

Ato sab ilakip paghisgot silang Michael Sumalinog didto sa UST Growling Tigers ug si Hermes Sumalinog Jr. sa MIT Chirping Cardinals. Silang duha igsoon ug mga maguwang sa usa ka mapasigarbohon nga Sugboanon nga si Christopher “Oping” Sumalinog kinsa sakop sa four-peat champions Ateneo de Manila ((ADMU) Blue Eagles, ang kampiyon sa 74th season sa University Athletics Association of the Philippines (UAAP) diin nahilakip na sila sa labing maayong collegiate team sa Pilipinas.

Giharus sa Blue Eagles ang Far Eastern University (FEU) Tamaraws sa ilang best-of-three championship series lakip na niini ang ilang 82-69 nga kadaugan sa Game 2 kaniadtong Septiyembre 29 didto sa Smart-Araneta Coliseum. Sila na karon maoy ika-upat nga UAAP team nga mikulit og record nga midaug og upat ka sagunson nga korona kauban sa University of the East, University of Sto. Tomas ug ang ilang higpit nga karibal ang De La Salle University.

Bisan tuod og panagsa lang siyang pasudlon, malipayon gihapon si Sumalinog isip sakop sa Blue Eagles ug matod pa niya, nakasabot siya sa iyang papel ug kuntento siya bisan sa gamay lang nga playing time nga ihatag ni coach Norman Black tungod kay mas importante alang kaniya nga makatabang sa ilang team.

Sa miaging tuig, wala makaduwa si Sumalinog tungod sa gisi sa “anterior cruciate ligament” usa ka matang sa piang sa tuhod nga gitawag og ACL. Matod pa ni Sumalinog, “Coach Norman Black has a system and I had to follow what he wants because like a good soldier, he must obey the order of the General. I have no problem with my role and I don’t complain of my playing time”.

Ang 22 anyos nga si Sumalinog kinsa anak ni kanhi University of the Visayas (UV) Green Lancer champion player Hermes Sumalinog, Sr., anaa na iyang kataposang season sa UAAP sa sunod tuig.

Misaad si Sumalinog, ang no. 17 player sa Blue Eagles nga iyang paningkamotan nga makatabang gihapon siya sa iyang team diin nagtinguha sila pagkulit ug UAAP record isip bugtong team nga adunay lima ka sagunson nga korona nga wala pa sukad mahitabo sa maong torneyo.

Si Sumalinog migamit sa jersey number 17 ug dili lang siya usa ka yanong player, usa sab siya ka Dean’s Lister sa Ateneo.

Gawas kang Sumalinog, nagduwa sab karon sa UAAP ang kanhi sentro sa UV nga si Greg Slaughter nga iyang kauban sa Ateneo ug laing Bisaya mao ang sakop sa FEU Baby Tamaraws nga si Jerie Marlon Pingoy kinsa maoy nahimong juniors MVP.

Si Pingoy kinsa gitawag og Koko sa iyang mga higala, anak ni Jerry Pingoy nga usa sab ka inilang player sa Sugbo.

Siya maoy nag-una sa statistical points ug iyang nalabwan ang laing Sugboanon nga si Kris Porter. Sa iyang kabatan-on, si Pingoy usa na sa sinaligan sa Baby Tamaraws ug siya maoy giumol nga maoy sumosunod sa mga inilang point guards sa FEU nga naglakip kanilang Johnny Abarrientos, Dennis Miranda, Mark Barroca ug Ryan Roose Garcia.

Gawas kang Pingoy kinsa gikan sa University of Cebu (UC) ug kang Porter nga ikan sa Sacred Heart School-Ateneo de Cebu (SHS-AdC) mga laing high school players nga misulbong karon didto sa NCAA mao silang Jessmar Villahermosa sa San Beda (kanhi sa USJR) ug silang Adven Jess Diputado ug Ray Daniel Abbu nga pulos gikan sa SHS-AdC.

Miscellaneous. Congrats to the Lite Shipping team of team owner Niño Imboy, the JCI-JBA 2011 Metro Cebu Uptown Jaycees basketball tournament at the Benedicto College gym in A.S. Fortuna street in Mandaue City over the weekend. The champion team who also includes Niño’s younger brother Jethro and Raymund “The Baby Face Assassin”, was mentored by Boy Te with ex-pro Elmer “Boy” Cabahug as team consultant.  - BANAT NEWS