'Bidoy' Aldeguer kulbaan sa "Pinoy Pride 8"

CEBU, Philippines - Nahingawa si Cebu boxing  patron ug ALA Boxing Gym founder Antonio 'Bidoy' Aldeguer sa iyang mga boksidor nga moaway sa "Pinoy Pride 8: Philippines vs. Mexico" karong Sabado diha sa Waterfront Cebu City Hotel and Casino.

Mitug-an si Aldeguer nga nabalaka siya tungod sa lisud nga sangka nga nagpaabot sa mga ALA boxers nga sila si Milan 'El Metodico' Melindo, Jason 'El Niño' Pagara ug Genesis Servania batok sa tagsa-tagsa nilang kaatbang nga pulos taga-Mexico.

"This is risky, kulbaan pud ko gamay especially for Servania and Pagara, kay Melindo salig kay he's in a high level already, pero dili pud kompiyansaan iyang kontra kay kusug pud," matud pa ni Aldeguer atol sa ALA Public workout niadtong miaging adlaw diha sa SM City-Cebu event center.

Ang taga-Bacolod nga si Servania (14-0, 5KOs) nangandam sa labing dakung hagit sa iyang karera batok sa kanhi world title challenger Gerson 'El Nene' Guerrero (34-8, 26KOs), samtang ang light welterweight prospect nga si Pagara (27-1, 16KOs) moharong ni Mexican knockout artist Rosbel 'Lobito' Montoya (12-1, 11KOs).

Sa dili pa ang iyang damgo nga world title fight, ang undefeated nga si Melindo (24-0, 8KOs) maninguha usab nga mapatumba ang beteranong si Francisco 'Chiquita' Rosas (22-8, 13KOs).

"You know we are doing this to raise the level of competitiveness, kay naay uban nga moreklamo nga we are giving our fighters weak opponents, this time its three Mexican boxers and we all know what they are capable of doing," dugang ni Aldeguer. "This is really a bigtime boxing card."

Gibutyag ni Aldeguer nga human sa Philippines vs. Mexico, suwayan nila pagpanday ang posibleng sangka sa mga Pinoy fighters, ning higayona batok sa Puerto Rican fighters.

Sa laing bahin, ang tulo ka mga Mexican boxers uban ang ilang trainers miabot na kagabii didto sa Mactan Cebu International Airport. - (BANAT NEWS)