Melligen mikulata ni Abing

CEBU, Philippines -  Walay kukaluoy nga gikulata ni ALA boxer John Rey Melligen ang bisitang taga-Tacloban nga si Ronel Abing aron pag-iskor og "unanimous decision" nga kadaugan sa Summit Natural Drinking Water Fight Night amateur series didto sa Gaisano Countrymall carpark.

Ang manghod ni world welterweight prospect Mark Jason Melligen nga si John Rey wala mohatag og kahigayunan ni Abing nga makaporma sud sa tulo ka rounds sa ilang away sa 57 kgs. division.

Sa iyang bahin, ang teammate ni Abing nga si Jan Ivor Lastrilla mikulit sab og daog batok ni Elmo Traya sa Consolacion.

Ang taga-Camotes Island nga si Elemar Baral midaog pinaagi sa puntos batok ni Marvin Mestola sa Ormoc, samtang ang Batang Lacion nga si Ritchie Montealto mikastigo ni Wendel Acharon.

Si Juren Labardo mipahunong ni Mardy Muana ug ang pambato sa Flores Boxing Club nga si Rando Torsendes mimakmak ni Jomar Senor.  (BANATSPORTS)