Pepo Rubi daog duha ka titulo sa 3rd Mayor Ricky Ramirez Cup moto-x

CEBU, Philippines -  Milangkat og duha ka titulo ug usa ka runner-up trophy si Pepo sa 3rd Mayor Ricky Ramirez Cup nga nagsilbeng 5th leg sa 2011 MS Motosuit Motocross Series niadtong Lunes didto sa Medellin.

Si Rubi nidaog sa pro class uban sa iyang teammate nga si Clark Wagas nga ni-okupar sa ikaduha, samtang si John Flores nalandig sa ikatulo.

Mao kini ang unang titulo sa beteranong si Rubi ubos sa pro division.

Ang teammates sa Quickflight Racing nga sila si Rubi ug Wagas nagbaylo og posisyon sa expert division diin si Wagas maoy naghari ug si Rubi nalabay sa ikaduha, samtang si Flores napilit gihapon sa ikatulo.

Nakabawi sab hinuon si Flores dihang iyang giharian ang underbone division batok nilang Jougee Basco ug Smith Supatan.

Si Rubi nilangkat sab og titulo sa intermediate class human niya gipilde silang Cyril Tariman ug Wagas nga ni-okupar sa ikaduha ug ikatulo nga dapit.

Nakadagit sab hinuon og titulo si Tariman sa open novice production batok nila ni Donkey Sanchez ug Ryan Paghasian.

Si Sanchez nihakot sab og duha ka titulo pinaagi sa open enduro batok ni Jay Sanico ug local enduro batok ni Alex Abalo, samtang si Ray Querol nahimutang sa ikatulo sa duha ka events.

Mipatigbabaw sab si Ray Querol sa beginner's open production batok ni Siegfred Ornopia sa Keiz BJ Racing.

Pakyas pagdaog si Ornopia sa kinaham niyang executive A human siya mapuhali sa langyaw'ng si Joseph Root. Sa executive B, si Roscel Gungob maoy mipatigbabaw, samtang si Butch Flores maoy nidominar sa executive C.

Ang kinamaguwangang anak ni Ornopia nga Brylle mipahiluna sa ikaduha sa mini 65 cc nga gidominar ni BJ Pepito. Si Pepito nihawod sab sa 50cc class batok nilang Froilan Mendaros ug Daniel Gastador.

Sa mini 85cc, si Jougee Basco maoy nidaog sa titulo batok nilang Ribrib Pepito ug Denmar Supatan. (BANAT NEWS)