Nietes, Vasquez magbinukbukay na didto sa Bacolod

BACOLOD CITY,  Philippines  -- Panahon na alang ni WBO minimumweight champion Donnie 'Ahas' Nietes aron ipamatuod nga angayan na siya sa iyang tinguha nga makuha ang ikaduha niyang kalibotanong bakus sa iyang pakigsangka batok sa Mehikanong si Armando 'Chiquita' Vasquez karong gabii dinhi sa St. La Salle Coliseum sa Bacolod City.

Atol sa official weigh-in kagahapon sa SM City-Bacolod event center, si Nietes mitimbang og 109 lbs., samtang si Vasquez adunay gibug-aton nga 107 lbs.

Atubangan sa liboan niya ka katagilungsod, ang taga-Negros nga si Nietes mibahad nga   tumbahon niya si Vasquez sa ilang duwelo karon.

"Daku gyud akong kalipay nga diri ko magdula atubangan sa akong mga kababayan," matud pa ni Nietes. "Tan-awon nako sa round 7 or ubos pa ako siya mapatumba."

Ang maong away maoy sukaranan alang ni Nietes aron mo-away alang sa WBO light flyweight batok sa modaog sa away tali ni Colombian Jesus Geles ug Ramon Garcia Hirales karong Abril 30 didto sa Mexico City.

Si Vasquez sa iyang bahin nagkanayon, nga bisan sa katang-an sa ALA boxer nga mibiktima na og pipila ka mga Mehikanong boksidor, mahatagan gihapon niya og lisud nga away si Nietes.

"I don’t see any weakness in him (Nietes), but I promised a good fight and it will be very difficult for him to fight a boxer with my style," matud pa sa 24-anyos nga si Vasquez.

Usa usab sa nakitang alas ni Vasquez mao ang kasinatian niya sa pakigsangka sa 108 lbs. division, itandi ni Nietes nga bag-o lang misaka og timbang.

Sa supporting main event sa ALA Promotions ug ABS-CBN Sports boxing event, ang ALA knockout artist nga si Jason Pagara makigbinukbukay sa Tanzanian nga si Deo Njiku alang sa WBO Youth AsPac light welterweight title.

Samtang si Lorenzo Villanueva manalipod sa iyang WBO Oriental featherweight title batok ni Ramadhani Shauri ug si Roli Gasca makigharong ni Ngaothawan Sithsaithong sa Thailand.  (BANATSPORTS)