Alexia Builders kampiyon sa Jun Pe Cup
CEBU, Philippines - Gipukan sa Alexia Builders ni businessman Allan Lim ang kanhi walay pilde nga Jo team, 97-88 aron sakmiton ang kampiyonato sa Jun Pe Sinulog Cup Councilor’s League 2011 basketball tournament didto sa Vicente Sotto Memorial gym sa barangay Punta Princesa, ning dakbayan.
Ang Alexia nisandig sa katakus nilang Lito Navarro, Cesar Ortega ug Robert Abasolo alang sa ilang 25-15 nga rally aron molabaw og nuybe puntos sa first half.
Mibawos ang Jo ni coach Charlie Reyes ug mihimo'g kaugalingon nilang 27-21 run aron mosikit, 68-70 sa pagpangulo ni ex-UV Lancer Rene Toring ug ni Mayor Mike Rama.
Apan wala mosalir ang ilang mga paningkamot kay nanginit man sila si Navarro, Ortega ug Abasolo aron sakmiton ang daog.
Si Navarro maoy nangu sa Alexia Builders sa iyang game-high 18 puntos, samtang sila si Abasolo ug Ortega nagkumboya’g 42 puntos.
Nangu sa Jo mao si Toring pinaagi sa iyang 20 puntos, gisundan ni Rama nga adunay 17 puntos. Mi-iskor sab og double figures sila si Glen Birao, Michael Arias ug Ronald Sanchez.
Sa sayo pa, ang Pardo Barkadahan ni Lando Almojallas nidaog batok sa RCAF ni Romeo Faunillan, 99-91 aron sakmiton ang ikatulong puwesto.
Ang kanhi SWU Cobra nga si Danny Aying maoy nangu sa Barkadahan sa iyang 30 puntos, samtang si Danrey Baclay, kinsa mitira og 20 puntos maoy nangu sa pilderong RCAF. (BANATSPORTS)
- Latest
- Trending
