Cuello andam na

CEBU, Philippines - Usa ka world title fight sa hinapos nga bahin ning tuiga ang gipaabot nga makuha ni Denver “The Excitement” Cuello human siya milampos pagdemolis sa Thai nga si Samat Chaiyong kagahapon didto sa Ynares Gym.

Ang promoter ni Cuello nga si Aljoe Jaro nagkanayon nga sa maong kadaugan ni Cuello hayag na ang kahigayunan ni Cuello aron mamahimong challenger alang sa WBC minimumweight title.

Si Cuello kinsa maoy nagkupot sa WBC international belt, mipakita sa iyang kusug dihang iyang girombo ang lawas ni Chaiyong sa fourth round.

Miresulta ang agresibong atake ni Cuello sa ikawalong round dihang miaksiyon na og kaluya ang Thai ug pag-abot ninth round, nakorner ni Cuello si Chaiyong dungan sa pagpauwan og mga solidong kombinasyon.

Wala na milihok pa si Chaiyong sa kilid sa ring samtang gidabo-dabohan ni Cuello hinungdan nga gihunong ni referee Bruce McTavish ang away.