Kaguol ug kalipay
Nasubo ko nga nalipay sa nahitabo sa atong football team nga Azkals tungod sa kapildihang 2-1 batok sa Mongolia Blue Wolves niadtong milabay’ng Martes atol sa 2nd leg sa AFC Challenge Cup pre-qualifying match didto sa Ulan, Bator.
Naguol ko kay napilde, sa yanong tumatan-aw o dili suhito sa rulings sa football, ang pilde sa match, pilde gyud.
Apan nalipay gihapon ko kay bisan sila napilde sila gihapoy nakasulod sa next round alang sa pagpadayon sa AFC ug makaatubang ang Myanmar. Kini tungod sa aggregate points.
Ang Azkals man gud midaog og 2-0 sa first leg batok sa Mongolia didto sa Panaad Stadium sa Bacolod City maong kinahanglan untang mo-iskor ang Mongolia og 3-0 o ba kaha 4-1 aron sila'y makasulod.
* * *
Mitapon na gyud sa Golden Boy Promotions si Nonito 'The Filipino Flash' Donaire gikan sa landong ni Bob Arum sa Top Ranks Inc. aron mao nay mo-promote sa mga mosunod niyang mga sangka.
Si Donaire nga usa sa labing kuyaw nga bantamweight champion ug nabutang sa listahan sa pound-for-pound fighters sa kalibutan, mao karon ang bag-ong pabilo sa panag-initay o panagribal ni Oscar Dela Hoya ug ni Arum.
Sa nanggawas nga report sa Philboxing.com, usa sa gibasol (partly daw) ni Arum ang asawa ni Donaire nga si Rachel.
Si Rachel kaniadto gibasol gihapon sa away ni Donaire ngadto sa iyang amahan nga si Nonito Sr. Hinuon sirado na ang maong hugna kay nagkauliay na ang tibuok pamilya.
Nagtuo gyud kong makaapekto unya ni sa dagan sa mga away ni Donaire, kay si Arum mibahad man gyud nga modangop sa legal nga proseso kay lagi nagtuo siyang pabiling naa sa iyang poder si Donaire base sa kontrata niini.
Lisud ra ba ning dunay nag-ungot nga legal impediments kay mahasol gyud ka, bisan champion pa ka sa boksing ug uban pa. Mahimo man gud nga momando ang korte nga dili una ka paawayon hangtod di maresolbar ang kaso. Sus kahasol!
Ang ako lang, bisan unsa pay dangatan anang kontrataha, unta dili mahimong rason ang nanggawas nga report nga dunay nalambigit nga ‘kasina’ sa maong isyu.
Kay lagi daw mas sikat si pound for pound king ug Congressman Manny Pacquiao nga ilawom gihapon sa landong ni Arum ug maglisod og sidlak og maayo si Donaire kun naa si Pacman sa linya.
* * *
GREETINGS. Belated happy birthday diay sa akong eldest daughter nga si Zoe Alexis nga nag-birthday niadtong Marso 18 ug sa iyang ig-agaw nga si KC Mae nga nagsaulog sa iyang birthday kagahapon (Sabado).
* * *
CONDOLENCE. Ako diay pahasubo sa mga kabanay sa among fraternity brother nga polis nga gipatay diha sa Balamban semana na kapin ang nakalabay.
* * *
PAGTULON-AN: “Walay bulok nga estudyante kun maayo ang magtutudlo”
* * *
- Latest
- Trending
