Melindo todo-ensayo alang sa "Pinoy Pride 2"

CEBU, Philippines - Todo-ensayo karon si undefeated flyweight prospect   si Milan 'El Metodico' Melindo sa final phase sa iyang training alang sa umaabot niyang away batok ni kanhi world champion Carlos 'El Olimpico' Tamara sa Colombia sa mega boxing card "Pinoy Pride 2" karong Nobiyembre 27 diha sa Waterfront Cebu City Hotel and Casino.

Ang ALA fighter nga si Melindo nga walay pilde sa 22 ka away, pito niini gikan sa knockout, magsagubang sa labing dakung hagit sa iyang batan-ong karera batok ni Tamara (21-5, 15KOs) nga padayon karong nag-ensayo didto sa Estados Unidos.

"Grabe gyud akong preparasyon ani nga away kay akong sangkaon usa ka former world champion, pero salig ko nga panahon na nako ni nga ipakita akong kusog," matud ni Melindo. "Dili nako palabyon ang maong kahigayonan ug buhaton nako tanan aron akong maangkon ang kadaugan."

Sa iyang bahin, si Tamara nga gikatakdang moabot dinhi sa Sugbu pipila ka adlaw sa dili pa ang "Pinoy Pride 2" event, nabantog sa kalibotan sa boksing human niya gi-TKO sa round 12 ang kanhi Fil-American champion nga si Brian Viloria niadtong miaging tuig didto sa Cuneta Astrodome.

Uban ni Melindo nga moaway sa maong boxing card mao si OPBF champion Rocky Fuentes, former IBF mini-flyweight king Florante Condes ug comebacking OPBF welterweight prospect Randy Suico.  – BANAT NEWS