CVIRAA Meet buksan na karon

CEBU, Philippines - Mosugod na ang mangtas nga Team Cebu City (TCC) alang sa ilang 18th overall championship sa Central Visayas Regional Athletic Association (CVIRAA) Meet nga pormal sugdan karong hapon didto sa Lamberto Macias Sports Center sa Dumaguete City.

Si Department of Education secretary Bro. Armin Altamirano Luistro, FSC motambong sa opening ceremonies.

Hinashasan nga mga atleta gikan sa nagkalain-laing eskuylahan sa Cebu City ang andam na nga manalipod sa ilang titulo nga ilang nakuha sukad sa pagsugod sa CVIRAA niadtong 1994.

Sa miaging tuig, ang TCC nihipos og 801.5 puntos aron langkaton ang korona didto sa dakbayan sa Danao.

Ang Cebu Province nga gibiyaan og daku sa 529.67 puntos mi-okupar sa ikaduha, gisundan sa Bohol uban sa ilang 327.75 points ug Mandaue City nga adunay 212.92 points.

Ang Cebu City makigtakus sa Bais, Bayawan, Bogo, Bohol, Carcar, Cebu Province, Danao, Dumaguete, Lapu-Lapu, Mandaue, Naga, Negros Oriental, Siquijor, Tagbilaran, Talisay, Tanjay ug Toledo.

Kapin sa 9,000 ka atleta ang mopakita'g aksiyon sugod ugma sa archery, arnis, athletics, badminton, baseball, basketball, boxing, chess, dancesports, football, gymnastics, lawn tennis, sipa/sepak takraw, softball, swimming, table tennis, taekwondo ug volleyball.

Ang delegasyon sa siyudad sa Sugbu girepresentaran sa mga mananaog sa miaging tuig nga Cebu City Olympics ug uban sa mga piniling atleta gikan sa nagkalain-laing tunghaan sa siyudad. (BANATSPORTS)