Taiyo Yuden kampiyon sa MEPZ-HRA bowlfest
CEBU, Philippines - Mihakot og 643 ka pinfalls ang Taiyo Yuden pinbusters aron maghari sa bowling event sa MEPZ-HRA Sportsfest bowling tournament diha sa SM bowling lanes.
Ang Lexmark maoy nakakuha sa ikaduhang puwesto pinaagi sa ilang 623 pinfalls, gisundan sa Fairchild Semiconductor nga mihagdaw og 594 pinfalls.
Mikompleto sa top five placers mao ang Timex nga adunay 593 pinfalls ug Pentax sa ilang 576 pinfalls.
Kinse ka teams ang misalmot sa bowling event sa MEPZ-HRA Sportsfest ubos sa tema nga “Healthy Na, Happy Pa.”
Lain pang misalmot mao ang Makoto, Teradyne, Christ-Philippines, Phil-Japan Metals, Jewelpico, Saturn, Aboitizland, MEPZ Safety and Security Council ug host MEPZ-HRA ubos ni Pat Niñal, ang HRA Manager sa Timex-Philippines.
Sa 2010 Bowling Masters event, si Alex Tan sa Lexmark maoy nakakuha sa unang puwesto ug gisundan ni Chris Ramil sa Fairchild alang sa ikaduha ug Imelda dela Cerna sa Timex sa ikatulong puwesto.
Hinuon, ang Timex maoy nakakuha sa overall championships sa individual ug team competitions.
Ang sportsfest tapuson pinaagi sa usa ka fun run diha sa Cebu Business Park karong Nobiyembre 14 ug sa maong adlaw himuon sab ang awarding ceremonies. (BANATSPORTS)
- Latest
- Trending
